ՀՀ ԱՆ. Համագործակցության հրավեր

Առողջապահության նախարարության հետ համագործակցությամբ հետաքրքրված բժշկական մասնագիտական ասոցիացիաները, որոնք համապատասխանում են «Բնակչության բժշկական օգնության և սպասարկման մասին» օրենքի պահանջներին, հրավիրվում են համագործակցության համաձայնագիր կնքելու:

Համագործակցության նպատակներն են`

• առողջապահության բնագավառում բնակչության առողջության պահպանումը և բարելավումը,
• բժշկական, դեղագիտական և ստոմատոլոգիական գործունեության զարգացումը,
• բուժաշխատողների իրավունքների իրացմանն օժանդակությունը և պաշտպանությունը,
• գիտական, կրթական, գիտահետազոտական, կլինիկական, լաբորատոր և նեղ մասնագիտական այլ գործունեության հետ կապված խնդիրների լուծումը:
  
  

Լիազոր մարմնի հետ համագործակցությունը սկսվում է ասոցիացիայի կողմից համաձայնագրին միանալու կամարտահայտությունը փաստող գրավոր ծանուցման պահից:

Համագործակցության շրջանակներում ասոցիացիաներն իրականացնում են հետևյալ գործառույթները.

• մասնակցում են առողջապահության բնագավառի նորմատիվ իրավական ակտերի մշակմանը՝ նախնական քննարկումներ կազմակերպելով իրենց անդամների շրջանում,
• մշակում են կլինիկական ուղեցույցներ և գործելակարգեր, մասնակցում են բժշկական օգնության և սպասարկման ընթացակարգերի մշակմանը,
• իրականացնում են իրենց մշակած և լիազոր մարմնի հաստատած կլինիկական ուղեցույցների և գործելակարգերի ներդրմանն ուղղված աշխատանքներ,
• լիազոր մարմնի առաջարկությամբ մասնակցում են բժշկական օգնության և սպասարկման տեսակների ցանկի և տեսակների շրջանակում մատուցվող ծառայությունների ցանկերի կազմմանն ու դրանց վերանայման աշխատանքներին,
• առաջարկություններ են ներկայացնում Հայաստանում չգրանցված, սակայն առողջապահության բնագավառում մասնագիտական գործունեության ընթացքում կենսական անհրաժեշտ դեղերի վերաբերյալ՝ դրանց գրանցումը կազմակերպելու նպատակով, այդ թվում՝ պետական պատվերի շրջանակներում,
• օրենքով սահմանված կարգով նրանց կարող են պատվիրակվել նաև այլ գործառույթներ:
  
  

ՀՀ առողջապահության նախարարության և բժշկական մասնագիտական ասոցիացիայի միջև կնքվող համագործակցության համաձայնագրի ձևին ու մանրամասներին կարող եք ծանոթանալ հետևյալ հղումով` https://moh.am/images/legal-1830.pdf:

Հարցեր, պատասխաններ, մեկնաբանություններ